ဇစ်မြစ်

ပြဿနာ မရှိ ပြဿနာ ရှာနေတဲ့ သူတစ်ပါး ရဲ့ အဖြစ်က စင်စစ် မိမိ အတွက် ပြဿနာ မဟုတ် ဘူး။ ပြဿနာ မရှိ ပြဿနာ ရှာနေတယ် လို့ မြင်နေ၊ ရှုနေ၊ ဆုံးဖြတ်နေ တဲ့ မိမိ အဖြစ် ကသာ – မိမိ အတွက် ပြဿနာ ဖြစ် တယ်။ မေးခွန်း ပုစ္ဆာပဲ ဖြစ်ဖြစ်၊ ရုန်းရင်းဆန်ခတ် အမူအရာ နဲ့ ပဲ ဖြစ်ဖြစ် – ကြုံဆုံမိလာမယ့် ဘယ် ပြဿနာ မဆို၊ ဖြစ်ရပ်တိုင်း ကို – တစ်ပါး သူ က ဘယ်တော့ မှ မဖန်တီး ဘူး။ သူတို့ ဖန်တီး တာ က – သူတို့ ပြဿနာ ဖြစ်ပြီး၊ သူတို့ ကြား မိမိ ဝင်လိုက်ချိန်မှာ – မိမိ အတွက် ပြဿနာ ဖြစ်သွားရတယ်။ ဆိုလိုတာက – မိမိ အဖြစ်ကသာ မိမိရဲ့ ပြဿနာ စင်စစ် ဖြစ် ပါတယ်။ ပြဿနာ အရှုပ်အထွေးဟာ မိမိ မပါဘဲ ဘယ်တော့ မှ ဖြစ်လေ့ မရှိဘူး။

ဒါ့ကြောင့် မို့လည်း – “စိတ္တေန နိယတိ လောကော” လို့ ဆိုဆို၊ ဆော့ခရတ္တိရဲ့ “Know Thyself” လို့ ဆိုဆို။ ဒီအဆိုတွေဟာ – ပြဿနာရဲ့ တံခါးပေါက် ကို ညွှန်ပြနေကြတာ ဖြစ် ပါတယ်။ မိမိ ရဲ့ လောက ကို မိမိ ကပဲ ဦးဆောင် ခေါ်ယူ တယ်။ မိမိ လောကကို မိမိ စိတ်ကသာ ဦးဆောင် ဆွဲ ခေါ်သွား တယ်။

အဖေ့ လက်ကို ကိုင်၊ အမေ့ လက်ကို ကိုင်ထားတဲ့ ခလေး ငယ်ရဲ့ လောကမှာလည်း အဲ့ခလေး ငယ် ရဲ့ စိတ်သန္တာန် သာလျှင် အခရာ ဖြစ် တယ်။ ကားကြီး တစ် စီးလုံး – အမျိုးအစား၊ လက္ခဏာ၊ မော်ဒယ်လ် နံပါတ်တွေ ဘယ်လို ကောင်းနေနေ၊ အင်ဂျင် မကောင်း၊ မောင်း တဲ့ အပေါ်၊ အထူး မှီခိုနေသေးတယ်။ ဒီလိုမှ မဟုတ်ရင် – ဒါကို ကား – လို့ ဘယ်သူမှ ခေါ်မယ် မဟုတ်ဘူး။ နွား တစ်ကောင် ကတဲ့ နွားလှည်း မှာ – နွား မလှုပ်ရင် -လှည်း မလှုပ်ဘူး။ လှည်း ပေါ် မှာ တဂျုံးဂျုံး တအုံးအုံး – ဘယ်လို ဖြစ်နေပါစေ – နွားမှ မရှိရင် ၊ ရှေ့ဦးဆောင် ဆွဲမယ့် သူ မရှိရင် – လှည်း ဟာ လှည်း နေရာမှာပဲ တဂျုံးဂျုံး ရပ်တန့် နေမှာပဲ။ ရှေ့ကို တစ်ချက်မှ ရွေ့မှာ မဟုတ်ဘူး။

ကြောင် တစ်ကောင် နှင့် ဆာမူရိုင်း ပုံပြင်

ဘာဝနာ ကို ဘာလို့ လိုအပ် ရသလဲ။ ဒီလို မေးလာခဲ့ရင် အဖြေက – ကျနော်တို့ တွေဟာ “သဘာဝ” အတိုင်း ရှိမနေကြ လို့ပါ။ အဲ့လိုပဲ ဖြေရ ပါလိမ့်မယ်။ တစ်နည်းပြောရင်- သဘာဝထက် ပို ကျော်လွန် နေကြလို့ – သဘာဝက ပေးသမျှ အတွင်းထဲ စိတ်ဆန္ဒ တွေ ထည့်သွင်း ပုံဖော်နေ ကြလို့ ဖြစ်ပါတယ်။

ကျနော် ဒီနေရာမှာ သုံးတဲ့ သဘာဝ ဆိုတာက – “အခု” အချိန်မှာ “အခု” ဖြစ်ရှိတဲ့ အတိုင်း ရှင်သန် နေထိုင်ခြင်း ကို ဆိုလို ပါတယ်။ “ဘာ လုပ်သင့်ပါတယ်” “ဘယ်လို လေးတော့ ဖြစ်သင့်ပါတယ်” စသဖြင့် အဲ့တာ တွေ မပါဝင်ဘူး။ ထပ် မထည့်ဘူး။ ဖြစ်တာကို ဖြစ်တဲ့ အတိုင်း အသိအမှတ် ပြုရုံမျှ လေးပါ။ “အခု” လက်ရှိ ခဏကို “အခု” လက်ရှိ ခဏ အတိုင်း လက်ခံ ထားရှိတာ သက်သက်ပါ။ စိတ်ဆိုးသလား – စိတ်ဆိုးတဲ့ အတိုင်း သိမှတ်ထားတယ်။ ထပ်ပြီး မဖြည့်- ထပ်ပြီး မပြင်တဲ့ “သဘာဝ”။ စိတ် မဆိုး ရခြင်း ရဲ့ ပုံရိပ်၊ စိတ်ဆိုး ရခြင်း ရဲ့ ပုံရိပ် – ဘာဆို ဘာမှ ဖြည့်စွက်ခြင်း ၊ နှုတ်ပယ်ခြင်း မရှိတဲ့ “သဘာဝ” ကို ဆိုလိုပါတယ်။ စိတ်ဆိုးလိုက်တယ် – ဒေါသထွက်လိုက်တယ် – အဲ့အခိုက်မှာ ဒေါသ ထွက် နေသလား – သိလိုက်တယ်။ အဲ့ဒါပဲ ရှိပါတယ်။ ဒေါသ စိတ် ပျောက်သွားတဲ့ အခါလည်း – ပျောက်သွားသလား- ပျောက်သွားတယ် ။ အဲ့ဒါပဲ ရှိနေ ပါတယ်။ မောဟိုက် ကျန်ရစ် ခဲ့ခြင်း၊ တွေးတော ကျန်ရစ် ခဲ့ခြင်း၊ ငါမှားပြီ လို့ ဆင်ခြင် မိခြင်း စသဖြင့် ဘာဆို ဘာမှ ထပ် မဖြည့်ပါဘူး။ ရိုးရှင်းစွာ နဲ့ အဲ့ဒီ အတိုင်း လက်ခံ ပါတယ်။ ဒါက ဒေါသ တစ်ခုတည်း ပြောတာပါ ။ တဏှာ၊ လောဘ၊ ချစ်ခြင်း မေတ္တာ စတာ တွေမှာလည်း အဲ့ဒီ အတိုင်းပါပဲ။ ချစ်တဲ့ စိတ် ရှိနေတဲ့ အခိုက် ချစ်တယ် ဆိုတာ သိရုံမျှလေး ပါ။ ချစ်သင့်လား မချစ်သင့်လား- ငါချစ်တာ ဘယ်သူလဲ ဘယ်ဝါလဲ- ငါ ဘယ်ပုံ ချစ်မလဲ-သူကရော ပြန်ချစ်မလား – အဲ့ဒါတွေ မပါဝင်ဘူး။ မထည့်သွင်း ထားဘူး။ ချစ်ခြင်း အဋ္ဌကထာ ဋီကာ တွေ ချဲ့ကား မနေဘူး။ ခင်ဗျား သန္တာန်မှာ ဖြစ်တဲ့ အတိုင်း ခင်ဗျား လက်ခံ သိမှတ် ထားတာ ရိုးရိုးလေးပါ။ အဲ့ဒီ ချစ်တဲ့ ခဏမှာ ချစ်တယ် ဆိုတဲ့ စိတ်က သဘာဝ အတိုင်း စီးမျော နေပါတယ်။

အမှောင်ပျောက်ဆုံးခြင်း ပုံပြင်

• ကိုယ့်အရိပ်ကို ကိုယ်မြင်နေရလို့ မကျေမနပ် ဖြစ်နေတဲ့ သူတစ်ယောက် ရှိခဲ့တယ်။ သူက သူ့အရိပ်ကို သူ့ အနားမှာ မရှိစေချင်ဘူး။ အဲ့ဒါ တစ်ခုတည်းတင် မကဘူး။ သူသွားသမျှ တစ်ကောက်ကောက် ပါလာနေတဲ့ သူ့ခြေရာတွေ ကိုလည်း မလိုချင်ဘူး။ စဉ်းစားလို့ ရသမျှ အဲ့ပြဿနာကို သူ ဖြေရှင်းတယ်။ တတ်သမျှ မှတ်သမျှ နည်းအမျိုးမျိုး နဲ့ ရှင်းတယ်။ မရတဲ့အဆုံးမှာ သူထွက်ပြေး ကြည့်တော့တယ်။
• ဒါပေမယ့် ဘယ်အချိန် ကြည့်လိုက် ကြည့်လိုက် သူ့ခြေရာဟာ သူနောက်မှာ တကပ်ကပ် ပါနေသေးတယ်။ အဲ့လိုပဲ သူ့အရိပ်ဟာလည်း သူ့အပါးက တပူးတွဲတွဲ ရှိနေသေးတယ်။ သူ တစ်ခု စဉ်းစားလိုက်တယ်။ “ငါ ပြေးတာ တော်တော်ဝေးဝေး မရောက်သေးလို့ပဲ ဖြစ်မယ်။” အဲ့ဒါနဲ့ သူ ပိုပြီး မြန်အောင် မြန်အောင် ပြေးတယ်။ နောက် ဆက်ပြီး မရပ်မနား ပြေးတော့တယ်။ ဘယ်ထိလဲဆိုရင် – သူ မောဟိုက်ပြီး သေဆုံးသွား တဲ့ အထိပဲ။
• တကယ်က သူဟာ အရိပ်တစ်ခုခု အောက်ထဲ ခိုဝင်လိုက်ရင် သူ့အရိပ် ပျောက်သွားမယ်။ သူသာ ငြိမ်ငြိမ်လေး ၊ ဘာမှ မလုပ်ဘဲ ရပ်နေလိုက်မယ် ဆိုရင် သူ့ခြေရာတွေလည်း ပျောက်သွားမယ် ။ အဲ့ဒါတွေကို သူ မသိခဲ့လိုက်လို့ ဖြစ်ပါတယ်။

……………………………………………

လူဟာ ကိုယ့်ကိုယ်ကိုယ် ငြင်းပယ်ခြင်း နည်းနဲ့ ကိုယ့်ဘာသာ အရှုပ်အထွေးကို ဖန်တီးတယ်။ စစ်မှန်တဲ့ ဝေဖန်နည်းမျိုးနဲ့ မဟုတ်ဘဲ- မိမိကိုယ်ကိုယ် သိမ်ငယ်အောင် ရှုတ်ချ ပစ်တယ်။ မိမိ အဖြစ်ကို မိမိ လက်မခံဘူး လို့ ဆိုလိုပါတယ်။ သူဟာ အနာဂတ်ကို အမြဲတမ်း မျှော်လင့် နေတယ်။ မနက်ဖြန် ဆိုတဲ့ အတွေးတွေ၊ စကားလုံးတွေ က သူ့ကို အမြဲ ဖုံးလွှမ်းထားတယ်။ သူ့ရဲ့ အခု ဒီအချိန်- နဲ့ – အခု ဒီနေရာကို မေ့ပျောက် ထားတယ်။ ဘာဖြစ်လို့ သူဟာ မိမိကိုယ်ကိုယ် ရဲ့ အခု အဖြစ်အရှိကို လက်မခံနိုင်ရတာတဲ့လဲ။ အခုအချိန် – အခု နေရာမှာ ဘာတွေ အမှား ရှိနေလို့လဲ။

ကျနော်တို့ ခင်ဗျားတို့မှာ အောင်မြင်ချင်တဲ့ ဖြစ်ချင်တဲ့ ပန်းတိုင်တွေ ကိုယ်စီ ရှိကြပါတယ်။ ဒါပေမယ့် ပန်းတိုင်တွေဆိုတာ အနာဂတ်မှာပဲ အမြဲ ရှိနေကြတာ ဖြစ်ပါတယ်။ ဘယ်ပန်းတိုင်မှ အခုပစ္စုပ္ပန်မှာ ရှိမနေဘူး။ အဲ့လိုပဲ အနာဂတ်ဆိုတာလည်း ဘယ်မှာမှ မရှိဘူး။ ဘာလို့ဆို အနာဂတ် ဆိုတာ မွေးမလာသေးဘူး။ အဲ့ဒီတော့ ခင်ဗျားတို့ ကျနော်တို့ အနာဂတ်မှာ ဖြစ်ချင်တဲ့ ပန်းတိုင်တွေဟာ အိပ်မက်တွေ သာ ဖြစ်တယ် – ဆိုတာကလွဲလို့ အခြား မဟုတ်ဘူး မလား။ ခင်ဗျားတို့ သတ်မှတ်ထားတဲ့ ပန်းတိုင် စံနှုန်းတွေဟာ အခုလက်ရှိ ဒီနေရာ-ဒီအချိန်မှာ ရှိမနေတဲ့ အခါ – မနေရတဲ့အခါ – မိမိကိုယ်ကိုယ် ပြစ်တင်တယ်။ ဒါမှမဟုတ် အာရုံလွှဲပြီး အခြား တစ်ခုခုကို ပြစ်တင်တယ်။ ပြီးတော့ မိမိကိုယ်ကိုယ် မြှားဦးလှည့်ရင်း သိမ်ငယ် ပစ်လိုက် ကြတယ်။ တကယ်တော့ အဲ့ဒီ စံနှုန်းတွေကြောင့် ခင်ဗျားတို့ ကျနော်တို့ စိတ်ရှုပ်ထွေး သွားရတော့တယ်။

ဖြူစင်မှုမှသာ ဖြူစင်မှု ဆီသို့

၁။ နာမ်ခန္ဓာ (လေးပါး) တို့သည် စိတ်လျှင် ရှေ့သွား ရှိကုန်၏၊ စိတ်လျှင် အကြီးအမှူး ရှိကုန်၏၊ စိတ်ဖြင့် ပြီးကုန်၏၊ ပြစ်မှား လိုသော စိတ်ဖြင့် အကယ် ၍ ပြောဆို သော် လည်းကောင်း၊ ပြုလုပ်သော် လည်းကောင်း၊ ကြံစည်သော် လည်းကောင်း ထို ပြောဆို ပြုလုပ် ကြံစည်မှု ကြောင့် လှည်းဘီး သည် ၀န်ဆောင်နွား ၏ ခြေရာသို့ အစဉ် လိုက်ဘိ သကဲ့သို့ ထိုသူသို့ ဆင်းရဲသည် အစဉ် လိုက်လေ၏။

၂။ နာမ်ခန္ခာ (လေးပါး) တို့သည် စိတ်လျှင် ရှေ့သွား ရှိကုန်၏၊ စိတ်လျှင် အကြီးအမှူးရှိကုန်၏၊ စိတ်ဖြင့် ပြီးကုန်၏၊ သန့်ရှင်း ကြည်လင်သော စိတ်ဖြင့် အကယ်၍ ပြောဆိုသော် လည်းကောင်း၊ ပြုလုပ်သော် လည်းကောင်း၊ ကြံစည်သော် လည်းကောင်း ထို (ပြောဆို ပြုလုပ် ကြံစည်) သောကြောင့် အရိပ်သည် (လူကို) မစွန့်မူ၍ အစဉ် လိုက်သကဲ့သို့ ထိုသူသို့ ချမ်းသာ သည် အစဉ်လိုက်လေ၏။

၃။ ဤသူသည် ငါ့ကို ဆဲရေးဖူးပြီ၊ ငါ့ကို ညှဉ်းဆဲဖူးပြီ၊ ငါ့ကိုအောင်နိုင်ဖူးပြီ၊ ငါ့ဥစ္စာကို ဆောင်ယူဖူးပြီဟု ထိုသူ့အပေါ်၌ ရန်ငြိုးဖွဲ့ကုန်၏၊ ထိုသူတို့အား ဖြစ်ပေါ်လာသည့် ရန်သည် မငြိမ်းအေးနိုင်။

၎။ ဤသူသည် ငါ့ကို ဆဲရေးဖူးပြီ၊ ငါ့ကို ညှဉ်းဆဲဖူးပြီ၊ ငါ့ကိုအောင်နိုင်ဖူးပြီ၊ ငါ့ဥစ္စာကို ဆောင်ယူဖူးပြီဟု ထိုသူ့အပေါ်၌ ရန်ငြိုး မဖွဲ့ကုန်၊ ထိုသူတို့အား (ဖြစ်ပေါ်လာသည့်) ရန်သည် ပြေငြိမ်း နိုင်၏။

၅။ ဤလောက၌ ရန်တုံ့မူခြင်းဖြင့် ရန်တို့သည် အဘယ်အခါမျှ မပြေငြိမ်း နိုင်ကုန်၊ ရန်တုံ့မမူခြင်းဖြင့်သာလျှင် ရန်ပြေငြိမ်း နိုင်ကုန်၏၊ ဤသဘော ကား အစဉ်အလာ ဓမ္မတာ သဘောပင်တည်း။

၆။ ဤလောက၌ လူမိုက်တို့သည် ငါတို့ သေကြလိမ့်မည်ဟု မသိကြကုန်၊ ထိုမသိမှုကြောင့် ခိုက်ရန်ငြင်းခုံမှုတို့သည် မပြေငြိမ်း နိုင်ကုန်၊ ဤလောက၌ ပညာရှိသူတို့သည် ငါတို့ သေကြလိမ့်မည်ဟု သိကြကုန်၏၊ ထိုသိမှုကြောင့် ခိုက်ရန်ငြင်းခုံမှု တို့သည် ပြေငြိမ်းနိုင်ကုန်၏။

၇။ တင့်တယ်၏ဟူ၍ အဖန်ဖန် ရှု၍နေသော ဣနြေ္ဒ တို့၌ မစောင့်စည်းဘဲ ဘောဇဉ်၌ အတိုင်းအရှည်ကို မသိမူ၍ ၀ီ ရိယ ယုတ်လျော့ ပျင်းရိသူကို လေမုန်တိုင်းသည် အားနည်းသော သစ်ပင်ကို နှိပ်စက် ညှဉ်းဆဲဘိ သကဲ့သို့ (ကိလေသာ)မာရ်သည် စင်စစ် နှိပ်စက်နိုင်၏။

၈။ မတင့်တယ် ဟု အဖန်ဖန် ရှု၍နေသော ဣနြေ္ဒတို့၌ ကောင်းစွာ စောင့်စည်း လျက် ဘောဇဉ်၌ အတိုင်းအရှည်ကို သိ၍ သဒ္ဓါတရား ရှိသဖြင့် ထက်သန်သော လုံ့လရှိသူ ကို လေမုန်တိုင်းသည် ကျောက်တောင်ကြီးကို မနှိပ်စက် မညှဉ်းဆဲ နိုင်ဘိ သကဲ့သို့ (ကိလေသာ) မာရ်သည် စင်စစ် မနှိပ်စက်နိုင်။

၉။ (ဣနြေ္ဒကို) ဆုံးမခြင်းကင်း၍ မှန်ကန်စွာ ပြောဆိုခြင်း မရှိသော ကိလေသာဖန်ရေ မကင်းဘဲလျက် ဖန်ရည်စွန်း သော အ၀တ် (သင်္ကန်း) ကို ၀တ်သောသူသည်၊ ဖန်ရည် စွန်းသော အ၀တ် (သင်္ကန်း) နှင့် မထိုက်တန်။

၁၀။ ဣနြေ္ဒ တို့ကို ဆုံးမလျက် မှန်ကန်စွာ ပြောဆိုခြင်း ရှိသော ကိလေသာဖန်ရေ ကို ထွေးအန်ပြီး၍ သီလတို့၌ ကောင်းစွာ စောင့်ထိန်းသူ သည်သာလျှင် ဖန်ရည် စွန်းသော အ၀တ်နှင့် ထိုက်တန်၏။

ချစ်လှစွာသော “ဗောဓိသတ္တဝ” အပေါင်းတို့။

မှန်၏။ ဤသို့ “ဗောဓိသတ္တဝ” ဟူ၍သာ ကျွန်ုပ်သည် သင်တို့ကို မြင်သည်။ ဤအမည်ပညတ် သည် သင်တို့ကိုယ်သင်တို့ စတင်ရှုမြင်ရန် အမည်လည်း ဖြစ်၏။ ဗောဓိသတ္တဝ ဟူသော အမည်သည် စင်စစ် အနှစ်သာရ အားဖြင့် ဗုဒ္ဓဖြစ်ခြင်း ကို ဆိုလိုသည်။ မျိုးသဏ္ဍာန် အားဖြင့် ဗုဒ္ဓဖြစ်ခြင်းကို ဆိုလိုသည်။ ဗုဒ္ဓ၏ အဖြစ်ဖြင့်သာလျှင် နိုးကြားစွာ အိပ်စက်ခြင်း ရှိသည်။ ဤအဓိပ္ပာယ် အားဖြင့် လူသား အားလုံး သည် ဗောဓိသတ္တဝ ဖြစ်သလော ဟု ထင်ဖွယ်ဟန် ရှိသည်။ ဟုတ်ပါသလော။

စင်စစ် အားဖြင့် လူသားတိုင်းကို ဗောဓိသတ္တဝဟု မခေါ်ဆိုနိုင်ပေ။

တဝဲလည်လည် ဖြစ်ရခြင်းများ

ဒီရက်ပိုင်းအတွင်း အဖတ်အများဆုံးနဲ့ စာအရေးဖြစ်ဆုံး ဟာ http://www.messagefrommasters.com/ က ဖြစ်ပါတယ်။ အိုရှိုး၊ ဂျစ်ဒူး ခရစ်ရှနမူရတိ၊ ဗုဒ္ဓ၊ ဇင် စသဖြင့် ဖတ် ဖြစ်တယ်။ စစတွေ့ကတည်းက တစ်နေရာထဲမှာ အစုံအလင်နဲ့ အလွယ်တကူ တွေ့ရတာမို့ အကြိုက်ဆုံး ၊ အနှစ်သက်ဆုံး ဆိုဒ် တစ်ခု ဖြစ်လာခဲ့တယ်။ အကြောင်းတိုက်ဆိုင်တယ်ပဲ ဆိုမလား။ ဆရာ ရဲထက်ရဲ့ အိုရှိုးပြောတဲ့ ဟင်းလင်းပြင် စာအုပ် ပြီးခဲ့တဲ့လက ပုံနှိပ် ထွက်လာ ခဲ့တယ်။ ရှိပြီး ဖတ်ပြီးသားတွေ ဘာသာပြန်ဆိုထားတာ သက်သက် ပေမယ့် အားပေးတဲ့ ၊ လေးစားတဲ့ အနေနဲ့ ဝယ်လာခဲ့တယ်။

အဲ့စာအုပ်မှာ ဆရာပါရဂူရဲ့ အမှာ၊ ကိုရဲထက်ရဲ့ နိဒါန်း အဲ့ဒါတွေက ဆွဲဆောင်မှု ရှိတယ်။ ကွယ်လွန်သွားရှာပြီ ဖြစ်တဲ့ ဆရာပါရဂူရဲ့ ဩဇာဟာ ကျနော့အပေါ်မှာ ၈၀ ရာခိုင်နှုန်းလောက် ရှိပါတယ်။ ဆရာပါရဂူ အပေါ်ကိုလည်း ဗုဒ္ဓ၊ အိုရှိုး၊ ခရစ်ရှနတို့က ၅၀ ရာခိုင်နှုန်း ကျော်ကျော် ဩဇာ သက်ရောက်ခဲ့တယ် လို့ ဆိုပါတယ် ။ ဒါဆို ကျနော့် ဆီမှာ ဟိုးငယ်စဉ်ကတည်းက ဒီပုဂ္ဂိုလ်တွေ၊ ဒီလူတွေရဲ့ ဩဇာဟာ ကိုယ်သာ နာမည် မမြင်မသိခဲ့ပေမယ့် စိုးမိုးပြီးသား ဖြစ်နေတယ်လို့ ဆိုရမလို ပဲ။

ဩဇာ သက်ရောက်ခံရတာဟာ လွတ်လပ်တဲ့ လူသား တစ်ယောက် အတွက် သွေဖယ်တဲ့ အဖြစ်တစ်ခုလို့ အဆိုရှိတယ် ။ ဒါပေမယ့် ဒီလူတွေရဲ့ ဩဇာက အခြား ဝါဒ၊ အခြား ဒဿနတွေရဲ့ ဩဇာနဲ့ မတူဘူး။ အခြား ဒဿနတွေရဲ့ ဩဇာ စီးဆင်းမှု လို လှောင်ချိုင့်တံခါးကို ဆွဲပိတ်ထားတာ မဟုတ်ဘူး။ သူတို့ရဲ့ ဩဇာက လှောင်ချိုင့်တံခါးကို ဖွင့်ပေးတာ သက်သက် ဖြစ်ပါတယ်။ သူတို့က ဘာကို လုပ်ပါ။ ဘာကိုမလုပ်ပါနဲ့။ သူတို့ကိုပဲ ယုံပါ၊ အခြားကို မယုံပါနဲ့လို့ မပြော ဘူး။ ကျနော်တို့ဟာ ကိုယ့်ကိုယ်ကိုယ် သိသင့်တယ်။ လွတ်လပ်မှု ဆိုတာ ဘာလဲ ၊ လွတ်လပ်မှု ဆိုတာ ရှိသင့်တယ်၊ ရိုးရှင်းမှု ဆိုတာဘာလဲ။ ရိုးရှင်းမှု ဆိ်ုတာ ရှိသင့်တယ်။ ဘဝရဲ့ ပြဿနာက ဘာလဲ။ ဘဝရဲ့ ပြဿနာကို သိသင့်တယ် ။ အဲ့ဒါတွေကိုပဲ လက်ညှိုး ညွှန်ပြခဲ့ကြတာ ဖြစ်ပါတယ်။

လမ်းကြောင်းကို လက်ညှိုးညွှန်ပြတဲ့ နေရာမှာ သူတို့က လက်ညှိုးကို ကြည့်ခိုင်းနေတာ မဟုတ်ဘူး။ လက်ညှိုးညွှန်ပြတဲ့ နေရာ၊လမ်း သက်သက်ကိုသာ ဖြစ်ပါတယ် ။ ဒီညွှန်ပြရာကို ခင်ဗျား သွားရင် ဒီလိုဟာကို တွေ့ပါလိမ့်မယ်။ လမ်းပြတာ သက်သက်ပဲ ။ ဒီလမ်းကို သွားရင် ဒီကိုရောက်မယ်။ ဟိုလမ်းကို သွားရင် ဟိုကို ရောက်မယ်။ သွားတာ မသွားတာကတော့ ခင်ဗျားနဲ့ပဲ ဆိုင်တယ်။ အတင်းအကျပ် သွားပါလို့ မပြောဘူး။ ဒီလို လမ်းညွှန်မှုမျိုး အခြားမှာ ရှင်းရှင်းလင်းလင်း ရှိပါရဲ့လား။ သူတို့ရဲ့ ဟောကြားသမျှမှာ – သူတို့ကို သိပါလို့ မပါဘူး။ ခင်ဗျားကိုယ် ခင်ဗျား သိပါလို့ပဲ ပါတယ်။ ခင်ဗျားရဲ့ ကမ္ဘာကို ခင်ဗျား ဖန်တီးလို့ ရတယ်။ ဖန်တီးနိုင်တယ်။ ဘယ်လို ဖန်တီးရင် ဘယ်လိုသက်ရောက်နိုင်တယ်။ ခင်ဗျားမှာ အမြင်တွေ မကြည်လင်ဘူးလား။ ခင်ဗျား ရဲ့ မှန်က မှုန်ဝါးနေသလား။ သူတို့က ကြည်လင်အောင် ကိုယ်တိုင် ကိုယ်ကျ လာသုတ်ပေးတာ မဟုတ်ဘူး။ လာလည်း မသုတ်ပေးနိုင်ဘူး။ ဒီမှန်ကို ကြည်လင် ချင်ရင် ခင်ဗျား ဘယ်လို သုတ်တာ ပိုကောင်းမယ်။ သုတ်ရမယ့် သူက ခင်ဗျား ကိုယ်တိုင်ပဲ ဖြစ်ပါတယ်။ ဒါကိုပဲ သူတို့ ပြောခဲ့ကြပါတယ်။

မိုးရွာတော့မယ့် တိမ်များ

Facebook ရဲ့ စာမျက်နှာ တစ်ခုက ကူးယူပါတယ်။ ရေးသူက ဘုန်းတော်ကြီး ဖြစ်မယ် ထင်ပါတယ်။ facebook name က မဟာ မနာပိ –။ သူ့ထံက ကျနော် ကူးယူခဲ့တာ ဒီတစ်ပုဒ် အပါအဝင် ဆိုရင် နှစ်ပုဒ် ရှိပါပြီ။ ပထမ ပို့စ်က — ကာလာမသုတ်တော်နှင့် ဝေဖန်ရေး– ပါ။ စိတ်အတွင်း တိုက်ရိုက် ဝင်ရောက်ရာမှာ အားကောင်းပြီး ရှင်းလင်းတဲ့ အမြင်တွေ ပါဝင်ပတယ်။ နောက်ပြီး ထေရဝါဒမှ ထေရဝါဒ၊ မဟာယာနမှ မဟာယာန ဆိုတဲ့ အမြင်တွေ မရှိ၊ ပုတ်ခတ်ခြင်း မရှိ၊ ရှုတ်ချခြင်း မရှိ၊ မောက်ကြွားခြင်း မရှိ၊ အမြင်ကို အမြင်အတိုင်းသာ ရှင်းလင်းထားချက်ကို ကြိုက်တယ်။

ဇေယျ။

………………………………………………….

ကုသုဒလို့ ခေါ်တဲ့ တိုကျိုက ဆေးဆရာလေးဟာ ဇင်တရားတွေ သင်ယူ နေတဲ့ ကောလိပ် ကျောင်းသားနဲ့ တွေ့တယ်။ ဆေးဆရာလေးက “ဇင်တရားဆိုတာ ဘာလဲ”လို့ မေးလိုက်တယ်။ ကောလိပ် ကျောင်းသားက “ငါ မပြောနိုင်ဘူး၊ ဒါပေမယ့် တစ်ခုတော့ ပြောနိုင်တယ်။ အဲဒါကတော့ မင်းအနေနဲ့ ဇင်တရားကို သဘောပေါက်ရင် သေရမှာ မကြောက်တော့ဘူး” လို့ ဖြေတယ်။ ဒီတော့ “အို… ဒါဆို သိပ်ကောင်းတာပေါ့” လို့ ပြောလိုက်တယ်။ “ဒီလိုဆို ငါ ဇင် တရားတွေ သင်ချင်တယ်။ ဆရာကို ဘယ်လို ရှာရမလဲ”လို့ ဆက်မေးတော့ “နန်အင်လို့ ခေါ်တဲ့ ဆရာဆီကို သွား”လို့ ပြောလိုက်တယ်။ ဆေးဆရာလေးဟာ ၉-လက်မခွဲရှိတဲ့ ဓားမြှောင်တစ်ချောင်းကို ယူသွားတယ်။ “ဒီဆရာ သေရမှာ ကြောက်သလား၊ မကြောက်ဘူးလား” ဆိုတာကို စုံစမ်းဖို့ စမ်းသပ်ဖို့ပေါ့။

နန်အင်ဆိုတဲ့ ဇင်ဆရာဟာ ကုသုဒကို တွေ့လိုက်တာနဲ့ “အိုအဆွေ… နေကောင်းလား။ ဒို့ မတွေ့တာတောင် အတော်ကြာပေါ့” လို့ နှုတ်ဆက် လိုက်တယ်။ ဆေးဆရာလေး ခေါင်းရှုပ်သွားတယ်။ ဒီတော့ “ကျုပ်တို့ တစ်ခါမှလည်း မတွေ့ဖူးဘဲနဲ့”လို့ တအံ့တသြ ပြောလိုက်တယ်။ “အင်း.. ဟုတ်တယ်၊ တစ်ခါမှ မတွေ့ဖူးပါဘူး၊ ငါ့ဆီမှာ ဇင်တရားတွေ လာသင်သွားတဲ့ ဆေးဆရာလေးတစ်ယောက်နဲ့ မှားသွားတာပါ”လို့ နန်အင်က ပြောတယ်။ ကုသုဒဟာ မမျှော်လင့်တဲ့ အဖြစ်အပျက်လေးကြောင့် ဇင်ဆရာကို စမ်းသပ်ဖို့ အစီအစဉ် ပျက်သွားပြီး ဇင်တရား သင်လို့ ရနိုင်မရနိုင် မေးလိုက်တယ်။

“အို ဇင်တရားဆိုတာ မခက်ပါဘူး၊ မင်းက ဆေးဆရာ၊ ဒီတော့ လူနာတွေကို ကြင်ကြင်နာနာနဲ့ ကုသပေးလိုက်၊ ဒါဆို မင်းဟာ ဇင်တရား ကျင့်သုံးနေတာပေါ့”လို့ ပြောလိုက်တယ်။ ကုသုဒဟာ နန်အင်ဆီကို သုံးကြိမ်တိုင်တိုင် သွားလည်တယ်။ ရောက်လာတိုင်း နန်အင်က ပြောလွှတ်တယ်။ “ဆေးဆရာလေး မင်းလို လူမျိုးက ဒီလိုနေရာမျိုးမှာ အချိန်မဖြုန်းသင့်ဘူး၊ လူနာအိမ်တွေကို သွားပါ၊ လူနာတွေကို ဂရုစိုက်ပါ”လို့ချည်း ပြောလွှတ်တယ်။

ဗမာ့အောင်ဆန်း ( ၁ )

ပြီးခဲ့သည့် ၁၅.၅.၂၀၁၁ ထုတ် မော်နီတာ ဂျာနယ်၊ အတွဲ ( ၁ ) အမှတ် ( ၅၂ ) တွင် ပြန်လည် ဖော်ပြ ပါရှိလာသော စာ ဖြစ်ပါသည်။ အပတ်စဉ် အပိုင်းလိုက် ခွဲပြီး ထုတ်ဝေလျက် ရှိသည်။ ကျနော်က ယင်းမှ တဆင့် အွန်လိုင်း မျက်နှာစာ ပေါ်သို့ ကူးယူ တင်ရှိထားခြင်း ဖြစ်ပါသည်။ တတ်နိုင်သရွေ့လည်း ဗိုလ်ချုပ်နှင့် ပတ်သက် သည်များ စုစည်း တင်ရှိသွားမည် ဖြစ်ပါကြောင်း။

ဇေယျ

……………………………………..

မောင်ထင်၏ ဗမာ့အောင်ဆန်း

ကျွန်တော်သည် ဗိုလ်ချုပ် အောင်ဆန်း နှင့် ငယ်ပေါင်း မဟုတ်။ ကြီးဖော် ဖြစ်သည်။ သူနှင့် ကျွန်တော် နှစ်ဦးသား တစ်ဦးနှင့် တစ်ဦး အသီးအခြား ကြီးပြင်း လာခဲ့ကြသည်။ သူ၏ ရေမြေ နှင့် ကျွန်တော်၏ ရေမြေ တို့ကား တခြားစီ။ ဗိုလ်ချုပ်က သူ မွေးဖွားရာ ဒေသ တစ်ခွင်ကို မြေလတ်ဟု ဆို၏။ သို့သော် ကျွန်တော်တို့ အောက်သား များအဖို့ နတ်မောက် သည်လည်း အညာ ပင်ဖြစ်၏။ အညာ ဒေသ၏ ပထ၀ီ သွင်ပြင် အရ ဗိုလ်ချုပ် ၏ တော၊ တောင်၊စိမ့်၊ စမ်း၊ မြိုင်၊ လျှို စသည့် ပတ်ဝန်းကျင် သြကာသ လောကမှာ ထူးဆန်း ထွေလျာ ပျော်မွေ့ရာ ဖြစ်လိမ့်မည် ဟု ကျွန်တော် ခန့်မှန်းမိ၏။ အကြောင်းသော် မူကား ကျွန်တော် မွေးဖွားရာ အောက်အရပ် မြစ်ဝကျွန်းပေါ် ဒေသ ဟူသည်မှာ ပင်လယ်၊ မြစ်၊ ချောင်း၊ လမုပင်၊ လတာပြင် တို့နှင့်သာ ရှုမျှော်ခင်း ကို တန်ဆာ ဆင်ထား လေရာ မည်သည့် အရပ်ကို ကြည့်ကြည့် ပတ်ဝန်းကျင် သြကာသ လောကကြီးသည် စိမ်းလဲ့သော တောတန်းတည်း ဟူသော မျဉ်းဖြောင့် တစ်ခု ပေါ်၌ အုပ်၍ နေသော မိုးကုပ် စက်ဝိုင်း တစ်ခုမျှသာ ဖြစ်၍ ငြီးငွေ့ဖွယ်ရာ ဖြစ်သောကြောင့်တည်း။

သို့သော် ကောင်းကင်မှ မိုးကုပ် စက်ဝိုင်းနှင့် မြေကြီးမှ တောတန်း ကလေးတို့ နှစ်ဦးသား ဆုံမိကြသည့် ပုံပမာလို သူ၏ ဘ၀ သံသရာ နှင့် ကျွန်တော်၏ ဘ၀ သံသရာ တို့သည် (၁၉၃၂) ခုနှစ် တစ်ဝိုက် ဆီလောက်က တက္ကသိုလ် သမဂ္ဂ ဆံပင်ညှပ်ဆိုင် ၌ ဖူးစာ ဆုံစည်း မိကြလေသည်။ ယင်းသို့လျှင် သူနှင့် ကျွန်တော်မှ ကျောင်းသားကြီး အရွယ်သို့ ရောက်ကြမှပင် အဆွေ ခင်ပွန်း ဖြစ်လေသောကြောင့် ကျွန်တော်တို့ နှစ်ဦးသားကို ကြီးဖော် ဟူ၍ ခေါ်နိုင်ပေသည်။ သို့သော် နှစ်ဦးသားမှာ တစ်ဦး နှင့် တစ်ဦး ခင်မင် ရင်းနှီး လာလေလေ တစ်ဦးပေါ် တစ်ဦး မြုံစေ့စေ့ နိုင်လေလေ ဖြစ်၍ တစ်ခါတရံ ကျွန်တော် ကိုယ်တိုင်က ပင်လျှင် သူ၏ ရင်းနှီးသော မိတ်ဆွေ ဟုတ်ပါလေစ ဟု သံသယ ဖြစ်မိသည်။